གསང་བདག་རྡོ་རྗེ་ཅན་གྱི་སྙན་དུ་གསོལ་བ་ཨུཏྤལ་སྔོན་པོའི་ཆུན་འཕྱང་།

༄༅། །གསང་བདག་རྡོ་རྗེ་ཅན་གྱི་སྙན་དུ་གསོལ་བ་ཨུཏྤལ་སྔོན་པོའི་ཆུན་འཕྱང་ཞེས་བྱ་བ་བཞུགས། ན་མོ་བཛྲ་པཱ་ཎི་ཡཻ། གང་ཞིག་མཐོང་ན་གཤིན་རྗེའི་ཕོ་ཉ་ཡང་། །བྲེད་འཐོམ་གྱུར་ནས་ཕྱོགས་བཅུར་འབྲོས་འགྱུར་བའི། །རྒྱལ་ཀུན་གསང་བའི་མཛོད་འཛིན་རྡོ་རྗེ་ཅན། །ཚངས་གནས་རྒྱན་དུ་རྟག་པར་བཞུགས་ཤིག་ཀྱཻ། ༡ །ཞིང་ཁམས་རྒྱ་མཚོར་ཁྱོད་གཅིག་ཁོ་ན་ཡི། །འདུལ་བྱེད་ཐབས་དང་འདུལ་བའི་སྟོན་པ་དང་། །གདུལ་བྱའི་འཁོར་སོགས་སྒྱུ་མའི་བཀོད་པའི་སྤྲིན། །མཐའ་དག་བློ་མཆོག་མངའ་རྣམས་གཞལ་བར་དཀའ། ༢ །འགྲོ་བ་ཀུན་གྱི་སེམས་ཀྱི་རྡོ་རྗེ་སྟེ། །ལམ་ཞུགས་རྣམས་ཀྱི་ཟག་མེད་གསར་ཐོབ་ཆ། །ལམ་མཐར་ཕྱིན་རྣམས་རྒྱུན་མཐའི་ཡེ་ཤེས་ཆེ། །དེ་དག་ཐམས་ཅད་ཁྱོད་ཡིན་གཞན་དུ་མིན། ༣ །འོག་མིན་ཆེན་པོར་གསང་ཆེན་རྒྱུད་སྡེའི་དོན། །འགྲོ་ངོར་གཟུངས་རིག་སྙིང་ཏིང་ཕྱག་རྒྱའི་ལྷ། །ཁྱོད་ཡིན་ཁྱོད་ནི་འགྲོ་རེའི་མདུན་དུ་ཡང་། །རྟག་པར་བཞུགས་མོད་ཕལ་གྱིས་མཐོང་མ་གྱུར། ༤ །ཨེ་མའོ་ཡ་མཚན་མཆོག་མངའ་རྡོ་རྗེ་ཅན། །ཁྱོད་ནི་བདུད་ཀྱི་བདུད་དེ་བགེགས་ཀྱི་དགྲ། །མུ་སྟེགས་ཀླ་ཀློའི་ཀླད་འགེམས་གདོང་ལྔའི་རྒྱལ། །ཁྱོད་དང་མཉམ་པ་སྲིད་ཞིའི་ཁོངས་ན་སུ། ༥ །ཨེ་མའོ་ཁྱོད་ནི་མ་འདྲིས་མཛའ་བའི་བཤེས། །བསྐུལ་བ་མིན་ཡང་དུས་དྲུག་འགྲོ་ལ་གཟིགས། །གསོལ་བར་མ་བྱས་ཉེས་བརྒྱའི་གཡང་ལས་སྲུང་། །ཁྱོད་ནི་བདག་གི་ཕ་ཡིན་མ་ཡང་ངོ་། ༦ །ཨེ་མའོ་ཁྱོད་ནི་བདག་གི་སྟོན་པ་སྟེ། །དགེ་བའི་བཤེས་ཡིན་ལམ་སྟོན་ས་མཁན་དང་། །འཇིགས་སར་སྐྱེལ་མ་ཉེས་པའི་ཆུ་ལོན་ཆེ། །བདེ་བའི་ངལ་སྟེགས་བགྲོད་པའི་ཁྱིམ་ཡང་ཡིན། ༧ །ཨེ་མའོ་ཁྱོད་ཀྱི་བ་སྤུ་ཕྲ་མོ་ཡི། །ཆ་ཤས་རེས་ཀྱང་སྲིད་གསུམ་ཁོངས་གནས་པའི། །ཆུ་སྲིན་རྒྱལ་མཚན་གཡོ་བའི་དཔུང་གི་ཚོགས། །བྱེ་མའི་སྙིམ་པར་རྡོ་རྗེའི་ཆར་བ་བཞིན། ༨ །ཨེ་མའོ་ཁྱོད་དང་འདྲ་བའི་ལྷག་པའི་ལྷ། །དུས་གསུམ་འབྱོན་དཀའ་ཨུ་དུམྦཱ་རའི་ཟླ། །སྐྱོབ་པ་མཆོག་ཀྱང་ཁྱོད་ལ་བརྟེན་ནས་ནི། །ས་གསུམ་གཡུལ་ལས་རྒྱལ་བའི་རུ་མཚོན་སྒྲེང་། ༩ །འདི་ན་སྙིགས་ལྔའི་ཚང་ཚིང་སྟུག་པོའི་ཁྲོད། །ཉེས་བརྒྱའི་མེ་ཡིས་བསྐོར་བའི་ཉམ་ཐག་བདག །ཕྱོགས་ཀུན་བལྟས་ཀྱང་ཞི་བའི་སྐབས་མ་རྙེད། །ཁྱོད་ཞབས་ཁོ་ན་བསིལ་བའི་ངང་ཚུལ་རིག ༡༠ །དེ་སླད་འཇིགས་པས་གནོན་པའི་འདར་ལྡན་ལས། །ལྡང་བའི་སྟབས་ཞན་འབྲོས་པའི་གོམ་འཁྱོལ་ཡང་། །རིངས་{རེངས་འདིའི་རིགས་འདི་ལྟར་ཞུས། }པའི་ཚུལ་གྱིས་ཁྱོད་དྲུང་བསྙེགས་ལགས་ན། །བརྩེ་བའི་བདག་ཉིད་དགོངས་པར་མཛད་དུ་གསོལ། ༡༡ །སྔོན་ཆད་བག་མེད་དབང་གིས་ནོངས་པའི་ཆ། །བཞིན་རས་མཆི་མའི་ཆར་གྱིས་བརླན་བཞིན་དུ། །དེ་རིང་གདུང་བའི་ཡུས་ཀྱིས་འཆགས་ལགས་ན། །མགོན་པོའི་ཐུགས་རྗེས་སྒྲིབ་པ་མེད་པར་མཛོད། ༡༢ །ཀྱེ་མའོ་ཉེས་པ་མངོན་སུམ་མཐོང་ནས་ནི། །འཇིགས་པས་གནོན་ཏེ་གདུང་བའི་འོ་དོད་འབོད། །ཤིན་ཏུ་མི་བཟད་དཀར་བ་མིན་པའི་དྲི། །སླད་ནས་མཛའ་བ་མིན་པའི་དཔལ་ཡོན་སྩོལ། ༡༣ །ཤ་ཟ་རྣམས་ཀྱང་བདེན་པའི་ཚིག་བརྗོད་པས། །ཞི་བར་འགྱུར་ན་བྱམས་ཆེན་འགྲོ་བའི་ཡབ། །བུ་ཡི་ནོངས་པར་ཅི་ཕྱིར་དགོངས་མི་མཛད། །ཐུགས་རྗེ་གཟིགས་ཤིག་མགོན་པོ་གསང་བའི་བདག ༡༤ །ཤ་ཟ་གཏིང་མཐའ་མི་མངོན་སྲིད་པའི་རྒྱ་མཚོ་རུ། །གཟུང་འཛིན་ཉོན་མོངས་ཆུ་སྲིན་གཏུམ་པོའི་ཁར། །གནས་བཅས་སྡུག་བསྔལ་གསུམ་གྱི་རྦ་ལ་འཆེ ལ། །འདི་ལས་སྐྱོབས་ཤིག་དཔའ་ཆེན་རྡོ་རྗེ་ཅན། ༡༥ །སྐབས་འགར་སྐྱེས་པའི་དགེ་བློ་ཉམ་ཆུང་ཞིང་། །ཐོག་མེད་གོམས་པའི་ཀུན་དཀྲིས་འཐུག་དྲག་པས། །གཉེན་པོས་བསྒྲིམས་ཀྱང་རང་ཚུགས་ཐུབ་པ་དཀའ། །དེ་སླད་སྐྱོབ་པ་ཁྱོད་ལ་སྙིང་ནས་འབོད། ༡༦ །ཉིན་པར་འབྲེལ་མེད་གཏམ་གྱིས་མགོ་བོ་འཁོར། །མཚན་མོ་གཏི་མུག་གཉིད་ཀྱིས་ཤེས་པ་ཉོབ། །རྣམ་ཀུན་ཆགས་སྡང་རྟོག་པ་ལུ་གུ་རྒྱུད། །འདི་འདྲས་སྲིད་པའི་འཆིང་བ་ནམ་ཞིག་ལྷོད། ༡༧ །ཀྱེ་ཧུད་མི་ཡི་ལུས་ལ་བྱུར་ཅན་སེམས། །དམར་སེར་རྟགས་ཀྱིས་སྤུད་ཀྱང་ཐ་མལ་པ། །དད་དང་སྙིང་རྗེའི་བརླན་བྲལ་བདག་གི་སྙིང་། །མ་རུངས་རྡོ་ཡི་གོང་བུ་འདི་ཡིས་ཅི། ༡༨ །རྨི་ལམ་ཡུན་འདྲའི་དལ་འབྱོར་རྟེན་ཐོབ་ཀྱང་། །དོན་མེད་འདིར་སྣང་སྲིན་མོའི་འཛུམ་གྱིས་བསླུས། །འདོད་ཡོན་ཚྭ་ཆུ་འཐུང་ལ་མ་ངོམས་བཞིན། །སྐྲ་དཀར་གཉེར་མའི་འཇིགས་གཟུགས་དེ་རིང་མཐོང་། ༡༩ །ཉི་སྲས་ཁྲོས་པའི་དུས་ཀྱི་ཞགས་པ་དེ། །ད་ཙམ་མི་འདེབས་ངེས་པ་སུས་ཤེས་ཨང་། །ཐུགས་རྗེས་གཟིགས་ཤིག་མགོན་པོ་བཅོམ་ལྡན་འདས། །རྟག་འཛིན་གདོན་འདི་དེ་རིང་ཟློག་ཏུ་གསོལ། ༢༠ །ཐོག་མ་མེད་ནས་སྙིང་ལ་གནས་བཅས་ཀྱང་། །རྒྱུ་རྐྱེན་མེད་པར་བདག་ལ་གནོད་པའི་དགྲ། །ཐར་པའི་སྲོག་འཕྲོག་ཡིད་བྱེད་བློ་ངན་འདི། །དེ་རིང་ཉིད་ནས་གཞོམ་པར་མཛད་དུ་གསོལ། ༢༡ །མཁྲིས་ནད་ཅན་གྱིས་ དུང་ལ་སེར་འཛིན་བཞིན། །གནས་ཚུལ་ཡང་དག་མཐོང་བ་སྒྲིབ་པའི་རྐྱེན། །རང་སྣང་ལོག་པར་ཞེན་པའི་རབ་རིབ་འདི། །ཡེ་ཤེས་ཐུར་མས་སོལ་ཅིག་མཐུ་སྟོབས་བདག ༢༢ །གང་དང་འཕྲད་ན་གཏན་དུ་འབྱོར་པའི་གཞི། །འཕགས་ནོར་བདུན་སོགས་ཟག་མེད་འདོད་དགུའི་དཔལ། །སློང་བར་བགྱིའོ་གཏོང་ལ་གོམས་པའི་ཕྱག །རིང་པོར་རྐྱོངས་ལ་སྦྱིན་པའི་སྒོ་ཕྱེས་ཤིག ༢༣ །བྱང་ཕྱོགས་རྣམ་ཐར་གཟུངས་སྤོབས་ཏིང་འཛིན་སོགས། །སྲས་བཅས་རྒྱལ་བའི་གསང་མཛོད་གཉེར་ཁ་པ། །ཁྱོད་གཅིག་ལགས་ན་ཁྱོད་ལ་རྟག་རེ་བའི། །བདག་ལའང་ཆ་ཤས་ཙམ་ཞིག་སྩལ་བར་འོས། ༢༤ །བེམ་པོའི་རང་བཞིན་ཙིནྟ་མ་ཎིར་ཡང་། །གསོལ་བ་བཏབ་པས་དབུལ་བ་འཕྲོག་བྱེད་ན། །ཁྱོད་ཞབས་བརྟེན་ནས་རྒུད་པ་སྐབས་མིན་ཕྱིར། །དེང་ནས་རྣམ་གྲོལ་ཡོན་གྱིས་འབྱོར་པར་མཛོད། ༢༥ །གནས་སྐབས་སུ་ཡང་བདུད་རིས་འཚེ་བ་ཞི། །ཚེ་བསོད་དཔལ་འབྱོར་ལེགས་ཚོགས་འཕེལ་ཞིང་རྒྱས། །སྣང་སྲིད་དབང་འདུས་སྲིད་གསུམ་བྲན་དུ་འཁོལ། །ཕྱོགས་ལས་རྣམ་པར་རྒྱལ་བའི་དཔའ་སྩོལ་ཅིག ༢༥ །མཐར་ཐུག་དབྱིངས་དང་ཡེ་ཤེས་ཟུང་འཇུག་པའི། །མཁའ་ཁྱབ་མཁའ་ཡི་རྡོ་རྗེའི་ཡེ་ཤེས་སྐུ། །དུས་བཞི་མཉམ་པ་ཆེན་པོའི་དཔལ་ཐོབ་ནས། །འགྲོ་ཀུན་བདུད་བཞིའི་འཕྲང་ལས་སྒྲོལ་གྱུར་ཅིག ༢༧ །ཅེས་པའང་ལས་དབང་གིས་སྙིགས་མའི་དུས་མཐར་སྐྱེས་པའི་བཙུན་གཟུགས་ཨོ་རྒྱན་ཐུགས་མཆོག་རྡོ་རྗེས་གང་ཤར་ཡུད་ཙམ་ལ་གསོལ་བ་བཏབ་པ་འགྲོ་ཀུན་བདུད་བཞིའི་གཡུལ་ལས་རྣམ་པར་རྒྱལ་བའི་རྒྱུར་གྱུར་ཅིག